سله الفحم والقرآن

السلام عليكم ورحمه الله

انا قرأت هذه القصه واعجبتى وياريت كل الاطفال والشباب يعرفوها

القصه بتقول ان كان فى جد شيخ كبير ومعه حفيده فى المنزل وكان الحفيد يرى جده يقرأ دائما فى كتاب واحد وبدأ الطفل يسال ايه الكتاب اللى جده بيقرأ فيه دايما

رد الجد وقاله انه القرآن الكريم

سال مره تانيه الطفل وليه بتقرأ فيه دائما

رد عليه جده وقاله اقرأ فيه وانت تعرف

بدأ الحفيد يقرأ فيه بس مكنش بيفهم كتير من اللى بيقرأه

فبدأ يترك قرأه القرآن وسال جده تانى وقاله انى مبفهمش كتير من اللى بقرأه يبقى ليه اقرأ القرآن
الجد رد عليه وهوه كان بيولع دفايه بالفحم وشايل فى ايده سله الفحم طبعا هيه سله من الخوص او عيدان القش

فالجد قال للحفيد تقدر تروح تجيب لى من البحر مياه فى السله

راح الحفيد وهوه مبسوط انه هيساعد جده

وحط مياه فى السله وراح ع البيت لجده بس لما وصل لقى ان السله فاضيه طبعا الميه كلها نزلت منها

قاله جده دى فاضيه طيب روح املاها وتعالى بسرعه قوى

راح الحفيد ورجع بسرعه لجده

بس كمان لقى السله فاضيه

قاله جده طيب المره دى انا هاجى معاك على الشط وتجيب الميه

راحو مع بعض عند الشط ونزل الحفيد للبحر يملى السله ميه ولما رجع لاقى السله فاضيه برضه

فزعل واضايق الحفيد وزهق من محاوله انه يملى السله

بس الجد الحكيم قاله طيب شوف السله كويس زى مانتى كنت واخدها منى اول مره

بص الحفيد وشاف ان السله نضفت من اللون الاسود اللى كان موجود فيها

وانها بقت نضيفه قوى واتغيرت للاحسن


قال جده شفت القرآن كمان بيعمل كده فينا

كل لما تقرأ فيه اكتر بيغير جواك حاجات كتير للاحسن وبيغيرك من جوه حتى لو محستش فى البدايه بالتغيير ولازم نداوم على قرأه القرآن حتى لو فى بعض المعانى اللى مش واضحه